بلاول بھٹو کی امریکی ہم منصب سے ملاقات، اقتصادی تعلقات بہتر بنانے پر زور

وزیر خارجہ کی اقوام متحدہ کے سیکریٹری جنرل انتونیو گوتریس سے بھی ملاقات، پاکستان کی خارجہ پالیسی کی اہمیت پر زور دیا
بلاول بھٹو کا جموں و کشمیر کا تنازعہ اقوام متحدہ کی سلامتی کونسل کی قراردادوں اور کشمیری عوام کی خواہشات کے مطابق حل کرنے پر زور
واشنگٹن(مانیٹرنگ ڈیسک)امریکی وزیر خارجہ نے بلاول بھٹو سے ملاقات کے دوران کہا کہ ہم امریکا اور پاکستان کے درمیان اقتصادی اور تجارتی تعلقات کو مضبوط بنانے کے لئے کام کر رہے ہیں۔تفصیلات کے مطابق وزیر خارجہ بلاول بھٹو زرداری نے نیویارک میں امریکی ہم منصب انٹونی بلنکن سے ملاقات کی ہے، ملاقات کے دوران انٹونی بلنکن نے وزیر خارجہ کو دیکھ کر خوشی کا اظہار کیا۔امریکی وزیر خارجہ کا اس دوران کہنا تھا کہ غذائی تحفظ ایک چیلنج ہے اور دنیا کے بہت سے مقامات غذائی عدم تحفظ کا شکار ہیں اور ہم اس سے نمٹنے کیلیے تیار ہیں۔انٹونی بلنکن نے کہا کہ دنیا بھر میں ضرورت مند لوگوں کی مدد کرنے کیلیے، غذائی عدم تحفظ سے متعلق مسائل کو حل کرنے کیلیے اقدامات اٹھائے جاسکتے ہیں۔ان کا کہنا تھا کہ ہم امریکا اور پاکستان کے درمیان اقتصادی اور تجارتی تعلقات کو مضبوط بنانے اور امریکی و پاکستانی سرمایہ کاروں کیلیے مواقع پیدا کرنے کے حوالے سے انتظامیہ کیساتھ کام کرنے کو تیار ہیں۔انٹونی بلنکن کے بیان پر ردعمل دیتے ہوئے وزیر خارجہ بلاول بھٹو زرداری نے کہا کہ پاکستان اور امریکا کے درمیان تعلقات میں اضافہ اور امریکی کاروباری افراد کیساتھ کام کرنے کیلئے تیار ہیں۔دوسری جانب وزیر خارجہ بلاول بھٹو نے اقوام متحدہ کے سیکریٹری جنرل انتونیو گوتریس سے ملاقات کی، اس دوران وزیر خارجہ نے پاکستان کی خارجہ پالیسی کی کثیر الجہتی اور اقوام متحدہ کی اہمیت پر زور دیا۔بلاول بھٹو نے کہا کہ پاکستان اقوام متحدہ کے چارٹر اصولوں پر سختی سے عمل پیرا ہے اور ہمیشہ ان اصولوں کے مطابق عالمی مسائل کے حل کی حمایت کی ہے۔ملاقات میں وزیر خارجہ نے ہندوستان کے غیر قانونی طور پر مقبوضہ جموں و کشمیر میں انسانی حقوق کی سنگین خلاف ورزیوں اور غیر قانونی آبادیاتی تبدیلیوں کی سنگین صورتحال پر روشنی ڈالی۔ وزیر خارجہ بلاول بھٹو نے جموں و کشمیر کا تنازعہ اقوام متحدہ کی سلامتی کونسل کی قراردادوں اور کشمیری عوام کی خواہشات کے مطابق حل کرنے پر زور دیا۔